Віртуальная выстава прымеркавана да Міжнароднага дня роднай мовы, які адзначаецца штогод 21 лютага з мэтай абароны моўнай і культурнай разнастайнасці. Свята было заснавана рашэннем 30-й сесіі Генеральнай канферэнцыі ЮНЕСКА ў лістападзе 1999 г. і святкуецца з 2000 г.
Віртуальная выстава “Родная мова – крыніца натхнення” прадстаўляе творы сучасных беларускіх пісьменнікаў з фонда бібліятэкі-філіяла №3.
Наша родная мова – гэта мова Скарыны і Буднага, Багдановіча і Купалы, Багушэвіча і Коласа, мова сотняў талентаў, што яшчэ прыйдуць нa нашу зямлю. Сучасных аўтараў аб’ядноўвае пачуццё адказнасці за сказанае і напісанае слова, любоў да нашай зямлі, што нам дадзеная лёсам, павага да традыцый, мовы і культуры беларускага народа.
-
- У кнігу “Ідэальны чытач” увайшлі аповесці і апавяданні, пераважная большасць з якіх у розныя гады друкавалася на старонках не толькі айчынных, але і замежных перыядычных выданняў. Творы Алеся Бадака прыцягваюць да сябе ўвагу як цікавымі сюжэтамі, так і своеасаблівым аўтарскім стылем.
-
- Гістарычны дэтэктыў… Колькі таямнічага, застрашлівага і рамантычнага можна сустрэць у сутарэннях часу! Чаму напрыканцы XIX ст. забіты былы паўстанец, паплечнік Кастуся Каліноўскага, Вінцэсь Рашчынскі? Якую таямніцу захоўвае каменная жаба з надмагілля? Ці можна ўявіць, каб пяць студэнтаў стварылі Каралеўства Беларусь? Ці сустракаліся вы з прывідам Кальварыйскіх могілак Мінска? У творах Людмілы Рублеўскай, уключаных у гэтую кнігу, – высакародства і подласць, каханне і здрада, экзістэнцыйны выбар між дабром і злом.
-
- Раман Віктара Праўдзіна “Нелюбімыя гінуць” – надзвычай сучасны, глыбока псіхалагічны і ў значнай меры – сентыментальны. У цэнтры ўвагі аўтара – лёсы трох жанчын.
-
- Займальны аповед пра прыгоды і каханне 17-гадовай беларускай князёўны Соф’і Гальшанскай і 70-гадовага вялікага князя літоўскага і караля польскага Ягайлы, чацвёртае шлюбаванне якога адбывалася ў беларускім Новагародку ў лютым 1422 года. У выніку ў Польшчы запачаткавалася вядомая на ўсю Еўропу каралеўская Ягелонская дынастыя.
-
- Тэма Вялікай Айчыннай вайны невычэрпная – пра гэта сведчыць і новы раман Уладзіміра Гніламёдава, які рэалістычна паказвае паднявольнае жыццё людзей на акупаванай нямецка-фашысцкімі захопнікамі тэрыторыі Заходняй Беларусі ва ўмовах нацысцкага рэжыму, узнікненне і арганізацыю супраціву, партызанскага руху, доўгачаканыя дні вызвалення.
-
- Кнігу прозы вядомага пісьменніка Георгія Марчука склалі тры раманы, якія адлюстроўваюць жыццё беларусаў у горадзе, у мястэчку, у вёсцы. Герой рамана “Сава Дым і яго жанчыны”, апынуўшыся ў горадзе, паддаўся спакусе жыць выключна для ўласнай асалоды, губляючы маральныя якасці.
-
- У кнігу Уладзіміра Федасеенкі ўвайшлі тры раманы. “Дубовая Града” і “Віхры на скрыжав аннях” прысвечаны барацьбе моладзі ў тыле ворага ў час Вялікай Айчыннай вайны, а “Пасля смерчу” – аб жыцці моладзі, яе вучобе, працы, каханні ў толькі што вызваленым ад акупантаў горадзе на Сожы.
-
- У рамане “А на беразе тым…” паказаны няпростыя жаночыя лёсы. У цэнтры – зусім маладая жанчына, якая шукае сваё шчасце за мяжой на востраве Крыт, і другая, ужо добра выпрабаваная жыццём, сустракае – ажно праз трыццаць гадоў – былое першае каханне і… Што чакае іх абедзвюх наперадзе…
-
- Кнігу прозы Анатоля Крэйдзіча склалі дакументальна-мастацкая аповесць пра вядомага беларускага мастака Янку Рамановіча, які жыве ў в. Моталь Іванаўскага раёна і прымае актыўны ўдзел у выставах у дзясятках краін свету, а таксама нарысы пра вядомых і адметных людзей Брэстчыны, літаратурныя роздумы пра рэчаіснасць у аўтарскім праекце “150 пісьменніцкіх радкоў”, філасофскія і жартоўныя мініяцюры.
-
- У зборнік Дзмітрыя Пятровіча ўвайшлі аповесці, апавяданні, эсэ, якія раней былі апублікаваны і атрымалі станоўчую ацэнку крытыкі і чытачоў, а таксама новыя творы пісьменніка.
Спіс літаратуры:
- Бадак, А. Ідэальны чытач : апавяданні, аповесці, запіскі на хаду / Алесь Бадак. – Мінск : Звязда, 2021. – 284, [2] с.
- Бутэвіч, А. І. Каралева не здраджвала каралю, або Каралеўскае шлюбаванне ў Новагародку : [раман] / Анатоль Бутэвіч. – Мінск : Літаратура і Мастацтва, 2010. – 318, [1] с. – (Святло мінуўшчыны).
- Гніламедаў, У. В. Вайна / Уладзімір Гніламёдаў. – Мінск : Беларуская навука, 2014. – 628 с.
- Крэйдзіч, А. М. Роднае, шчымлівае : кніга прозы / Анатоль Крэйдзіч. – Мінск : Літаратура і Мастацтва, 2012. – 205, [2] с., [4] л. каляр. іл. – (Лімаўскі фальварак).
- Марчук, Г. Сава Дым і яго жанчыны : раманы / Георгій Марчук. – Мінск : Мастацкая літаратура, 2016. – 603, [2] с.
- Праўдзін, В. А. Нелюбімыя гінуць : проза / Віктар Праўдзін ; [прадмова Віктара Гардзея]. – Мінск : Мастацкая літаратура, 2010. – 373, [2] с. – (Залатое пяро).
- Пятровіч, Д. Л. Анёлы : аповесці, апавяданні, эсэ / Дзмітрый Пятровіч. – Мінск : Мастацкая літаратура, 2015. – 188, [2] с.
- Рублеўская, Л. І. Пярсценак апошняга імператара : раман, аповесць, апавяданні / Л. Рублеўская. – Мінск : Мастацкая літаратура, 2005. – 279 с. – (Сучасны беларускi дэтэктыў).
- Федасеенка, У. К. Віхры на скрыжаваннях : раманы / Уладзімір Федасеенка. – Мінск : Мастацкая літаратура, 2014. – 582 с.
- Хвалей, Я. І. А на беразе тым… : раман / Яўген Хвалей. – Мінск : Чатыры чвэрці, 2021. – 157, [1] с. – (Серыя “Жаночыя лёсы”).
[свернуть]
