21 лютага адзначаецца Міжнародны дзень роднай мовы. У нашым свеце налічваецца больш за шэсць тысяч моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна мова, якую ён лічыць роднай. Менавіта на гэтай мове ён размаўляе з сябрамі, знаёмымі, сваякамі. Менавіта яна для яго найпрыгажэйшая.
Да Дня роднай мовы ў бібліятэцы–філіяле №5 арганізавана і дзейнічае тэматычная кніжная выстава “Родная мова – крыніца празрыстая”, з якой можна азнаёміцца, наведаўшы бібліятэку па адрасе вул. Ракасоўскага, 29.
-
- На старонках выдання аўтар запрашае чытачоў малодшага і сярэдняга школьнага ўзросту ў падарожжа па розных краінах свету. Аднак зрабіць гэта прапаноўвае з дапамогай роднага беларускага слова. Адкуль пайшла наша мова? Ці ёсць у яе «сёстры»? Па якіх законах яна жыве і развіваецца? Адказы на гэтыя пытанні цікаўных шкаляроў дае аўтар кнігі.
-
- Сёмы том «Энцыклапедыі для школьнікаў і студэнтаў» уключае больш за 290 артыкулаў, якія прысвечаны беларускай мове, яе гісторыі і сучаснаму стану, гукавому і лексічнаму складу, фраземнаму фонду, графіцы і арфаграфіі, марфалогіі і сінтаксісу, дыялектнаму падзелу, слоўнікам і інш.
-
- Кніга ахоплівае найбольш ужывальную, тэматычна згрупаваную лексіку, якая адлюстроўвае навакольны і ўнутраны свет дзіцяці. Тлумачэнне і засваенне слова даецца не толькi праз малюнак, але і праз жыццё яго ў сказе. Словаўжыванне выступае ў сказах выразна, досціпна, з гумарам. Матэрыялы “Чую, бачу, гавару” дапамагаюць выдатна вучыцца і плённа бавіць вольны час, атрымліваць дадатковыя веды па розным школьным прадметам.
-
- Багацце нашай мовы, якое называецца Лексікай, — невычэрпная крыніца, якая дорыць словы-самацветы для стварэння незвычайных прыгод, карцін, замалёвак. Толькі варта вельмі ўважліва паставіцца да Слова. У кнізе сабраны невялічкія рыфмаванкі, якія дапамогуць пазнаёміцца, зразумець і засвоіць раздзел лексікі, які называецца амонімы — словы, што гучаць аднолькава, але маюць рознае значэнне.
-
- З новай кнігі серыі «Таямніцы беларускай мовы» маленькія беларусы даведаюцца, адкуль пайшла наша родная мова, якое месца яна займае сярод моў свету, з якімі мовамі мае сваяцкія стасункі. Падчас чытання дзеткі будуць спасцігаць асновы мовазнаўства, вучыцца паважаць родную мову і мовы іншых народаў. Выданне ўтрымлівае рознабаковыя звесткі, а таксама займальныя заданніі.
-
- Калі вы ніколі не запісвалі лічбы літарамі і не ведаеце, што некалі кожная літара алфавіта мела сваю адмысловую назву, тады самы час адправіцца ў падарожжа ў свет гэтых спецыфічных графічных знакаў. На старонках кнігі кемлівы чытач знойдзе шмат цікавай інфармацыі з гісторыі з’яўлення літар, іх напісання і ўжывання, а таксама дазнаецца, якія з іх асабліва ўшанаваны ў Беларусі.
-
- У кнізе прапануюцца займальныя заданні з літарамі і словамі, гульні, красворды, крыжаванкі, пытанні на кемлівасць, анаграмы, шарады, загадкі на амонімы і антонімы, а таксама каламбуры, скорагаворкі, азбука, жартоўныя і іншыя вершы. Іх змест скіраваны на абуджэнне цікавасці да роднай мовы, на выяўленне яе багатых магчымасцяў.
-
- Аснова любой мовы — алфавіт, літары. У гэтым выданні да кожнай літары беларускага алфавіта аўтарам прыдуманы вясёлыя вершы-карацелькі, якія павінны дапамагчы самым маленькім вывучыць парадак літар у алфавіце. Хлопчыкам і дзяўчынкам, якія ўжо добра ведаюць азбуку ці чытаюць самастойна, яны дапамогуць засвоіць шмат самабытных беларускіх слоўцаў.
-
- Націск — такі маленькі значок, але колькі моцы ён утрымлівае. Ад яго ў беларускай мове залежыць напісанне некаторых слоў, а таксама іх значэнне. Якая навука займаецца вывучэннем націску, якія маўленчыя адзінкі націску ў беларускай мове — адказы на гэтыя пытанні кемлівы чытач знойдзе на старонках гэтай кніжкі.
-
- Чытанка «Азбукоўнік і лічылка» – унікальнае выданне, апрабаванае дашкольнымі ўстановамі краіны, якое адкрывае для дзяцей магчымасць атрымання першапачатковых чытацкіх і матэматычных ведаў. Матэрыял па вывучэнні літар і лічбаў грунтуецца на творах класікаў беларускай літаратуры і сучасных нашых аўтараў – апавяданнях, вершах, загадках, а таксама на вуснай народнай творчасці – народных казках, паданнях, забаўлянках і інш.
Спіс літаратуры:
- Азбукоўнік і лічылка : апавяданні, вершы, казкі, лічылкі / укладальнік З. І. Кустава ; мастак У. С. Пашчасцьеў. – Мінск : Мастацкая літаратура, 2012. – 327 с.
- Зелянко, С. В. Беларуская мова сярод моў свету : для малодшага школьнага ўзросту / С. В. Зелянко. – Мінск : Беларуская Энцыклапедыя імя Петруся Броўкі, 2020. – 32 с. : іл. – (Таямніцы беларускай мовы).
- Зелянко, С. В. Знаёмыя незнаёмцы : сакрэты літар : для малодшага школьнага ўзросту / С. В. Зелянко. – Мінск : Беларуская Энцыклапедыя імя Петруся Броўкі, 2019. – 48 с. : іл. – (Таямніцы беларускай мовы).
- Зелянко, С. В. Пра літары карацелькі : для малодшага школьнага ўзросту / С. В. Зелянко ; мастак Н. В. Кульба. – Мінск : Беларуская Энцыклапедыя імя Петруся Броўкі, 2019. – 32 с. : іл. – (Маленікі прафесар).
- Зелянко, С. В. Сціслы аповед пра сціплы знак : націск : для малодшага школьнага ўзросту / С. В. Зелянко. – Мінск : Беларуская Энцыклапедыя імя Петруся Броўкі, 2018. – 32 с. : іл. – (Таямніцы беларускай мовы).
- Зелянко, С. В. Таямніцы беларускай мовы : [для малодшага і сярэдняга школьнага ўзросту] / С. В. Зелянко. – Мінск : Беларусь, 2022. – 286, [1] с. – (Вялікая энцыклапедыя маленькага прафесара).
- Кажура, В. Слоўца да слоўца : анонімы для пачатковай школы : для малодшага школьнага ўзросту / В. Кажура ; мастак Т. Пінчук. – Мінск : Беларуская Энцыклапедыя імя Петруся Броўкі, 2020. – 32 с. : іл. – (Таямніцы беларускай мовы).
- Клышка, А. К. Чую, бачу, гавару : вучэбны наглядны дапаможнік для вучняў пачатковых класаў устаноў агульнай сярэдняй адукацыі з беларускай і рускай мовамі навучання / Анатоль Клышка ; [ілюстрацыі М. Р. Казлова і Н. У. Суставай]. – 2-е выданне, перапрацаванае. – Мінск : Асар, 2012. – 135 с.
- Пазнякоў, М. П. Гульняслоў : гульні з літарамі і словамі / Міхась Пазнякоў. – Мінск : Літаратура і Мастацтва, 2011. – 128 с.
- Энцыклапедыя для школьнікаў і студэнтаў : у 12 т. / рэдкалегія: У. У. Андрыевіч і інш. – Мінск : Беларуская Энцыклапедыя імя Петруся Броўкі, 2017. – Т. 7 : Беларуская мова. – 496 с. : іл.
[свернуть]
